فى يوم ماشى فى الشارع #

فى يوم ماشى فى الشارع
سمعت كلام عجيب
وشفت الناس طوابير
على الشباك الرهيب
شباك جواز المرور
على البلد المريب
بلاد الظمبليطه
عند ولاد العبيطه
بلاد اصل الاونطه
مش اللى جوا الشنطه
لا الاونطه الاصلى
اقعد بقى وارفصلى
واسمع كلام عجيب
شاهد فى خلق غريب
انا خدت جواز مرور
على هذه البلاد
ويا لهوى على اللى شفته
شفت العجب العجاب
عيال زى القرود
قلت انا ادها وادود
انا راح اسلك معاهم
اصل انا على كيف كيوفك
واد صاحى م اللى هوا
تعرف ايه اللى حصلى
هتخبط على كفوفك
سرقوا كل المهيه
من جيب الجلابيه
ولبست السلطانيه
معرفتش الا امتى
لما كلت الاونطه
كملت سكتى
وفضلت ماشى فيها
ومعايا السلطانيه
لحد ما شفت حاجه
خليتنى مش مبسوط
صحاب السلطانيه
واقفينلى بالسلاح
عايزين السلطانيه
يا اما هيقتلونى
ولبعض يلقفونى
او حتى يشقلطونى
اتارى السلطانيه
وانا ماشى وقعت منى
ايه المصيبه ديه
ملقوش السلطانيه
خدوا منى الجلابيه
مشيت وانا عريان
بردان وكمان جعان
معرفتش جيت منين
ولا عارف رايح فين
لقيت الناس بتجرى
على طول جريت معاهم
اتارى فى موجه وخداهم
سالت موجه ايه
قالولى الجوع الكافر
ياريتنى ما قلت اسافر
الناس بتجرى بسرعه
قالولى تعالى يلا
قلتلهم اشطى ماشى
اهى موجه والسلام
الموجه فيها ايه
مليانه عيش بلحمه
انا قلت زحمه زحمه
بس اطلعلى برغيف
طالبت بالرغيف
قالولى فى مقابل
قلتلهم ايه المقابل
قالولى هات شهود
انك كان ليك جدود
وكان ليهم حضاره
او هات صوره البطاقه
وشهاده م الوزير
انك جعان كتير
يخرب بيت الوزير
على بيت ابو الوزير
قالوا مترغيش كتير
وتبرطم فى الكلام
واتكلم باحترام
قلتلهم ماشى حاضر
فتحولى اوام محاضر
ولبسونى قضايا
وقالولى روح يا ضنايا
بقيت مسجل خطر
مطر ساعتها المطر
اقلام وشلاليت
وقالولى يا عبيط
فتح مخك معانا
وراح تسلك ويانا
انا طبعا مش فاهمهم
انا اصلى خايف منهم
دموعى نزلت منى
وكلامهم دا جننى
ودماغى راحت منى
عشان انا اللى غلطان
طماع كبير كمان
عشان جيت البلد دى
وعملت فيها ناصح
وقلت محدش قدى
انا ندمان وجعان
فى البرد انا عريان
انا عايز ارجع بلادى
مفيش اتوبيس معادى
ارجع لمراتى اذاى
واقبلها بانهى وش
وحماتى لما تشوفنى
اهى راح تدينى دش
شتايم وردح الخ الخ
هتقولى فين ماهيتك
برده هتقولى بخ
ما انا لازم اكتم بقى
واخفى عنها الحقيقه
و اظهر نظره بريئه
ربنا يكفينى لسانها
دى رداحه زمنها
انا اللى جبته لنفسى
عشان ساقتنى نفسى
على بلد الظمبليطه
عند ولاد العبيطه
ضحكو عليا وخلاص
وسابولى لا مؤاخذه لباس
وفانله بحمالات
وخدوا كل الحاجات
انااللى غلطان وواد اهبل كمان
انا مش عارف ارجع
وشكلى عمرى مهرجع
مشيت عمال اتكتك
وجسمى كله مفكك
ومش طايق هدومى
طب هى فين هدومى
وفين ازيح همومى
وهى دى حكايتى
ياترى دى نهايتى
ولا بدايه حكايتى